الحل ايه

أكيد الموضوع المثار على الساحة اليومين دول موضوع مباراة مصر والجزائر يوم 14 نوفمبر . ناس كتير سواء كانوا مصريين أو جزائريين بيعتبروا المباراة دى موقعة حربية - صراحة مش عارف ازاى يعنى - يجوز فيها استخدام جميع الأسلحة ويجوز فيها الخداع والتكتيك ... اللى يسمع الكلام ده يفتكر انه شغل مدربين داخل الملعب ... لا ده مناصرى ومشجعى الدولتين قلبوها موقعة حربية بينهم خارج الملعب مش داخله . وجات شوطة فى المواقع الالكترونية فى البلدين عمالين يشتموا فى بعض ... لا والشوطة دى وصلت الاعلام المرئى فى البلدين والبرامج الرياضية شغالة شتيمة ... ما تفهمش فى ايه أصلا ... ده مجرد ماتش كورة ... ولو قلت لواحد مصرى ليه كده يقولك الجزائريين اللى بدأو . ولو سألت واحد جزائرى ليه كده يقولك المصريين اللى بدأو ... فتحتار مين اللى بدأ الليلة الكبيرة اللى احنا فيها دى ... على العموم هى بدأت ومش هنختلف على مين اللى بدأها المهم انها بدأت وعايزينها تنتهى ... السؤال بقى هنا : ازاى تنتهى ؟ سألت نفسى فى مرة تفتكر يا واد يا محمد الحل ايه ؟ ممكن نعمل تهدئة بين البلدين ... قلت لا مش نفعت , عملها شوبير والمصريين قالوا عليه خاين وعميل ... ممكن المسؤلين بتوعنا فى الحكومة يتحركوا ويعملوا حاجة ... لا مش ينفع احنا عارفين حكومتنا مهما تقولهم ودن من طين وودن من عجين وعايشين فى التراوة على الأخر ...